ชั้นประโยค ป.ธ.๓

	๒. มารวตฺถุ. (๑๕๘)

	"สุสุขํ วตาติ อิมํ ธมฺมเทสนํ สตฺถา ปญฺจสาลายํ
พฺราหฺมณคาเม วิหรนฺโต มารํ อารพฺภ กเถสิ.

เอกทิวสํ หิ สตฺถา ปญฺจสตานํ กุมาริกานํ โสตาปตฺติ- มคฺคสฺส อุปนิสฺสยํ ทิสฺวา ตํ คามํ อุปนิสฺสาย วิหาสิ. ตาปิ กุมาริกาโย เอกสฺมึ นกฺขตฺตทิวเส นทึ คนฺตฺวา นหายิตฺวา อลงฺกตปฺปฏิยตฺตา คามาภิมุขิโย ๑ ปายึสุ. สตฺถาปิ ตํ คามํ ปวิสิตฺวา ปิณฺฑาย จริ. มาโร สกลคามวาสีนํ สรีเร อธิมุจฺจิตฺวา, ยถา สตฺถา กฏจฺฉุภิกฺขามตฺตํปิ น ลภติ, เอวํ กตฺวา ยถาโธเตน ปตฺเตน นิกฺขมนฺตํ สตฺถารํ คามทฺวาเร ตฺวา อาห "อปิ สมณ ปิณฺฑํ อลภิตฺถ าติ. "กึ ปน ตฺวํ ปาปิม ตถา อกาสิ, ยถา อหํ ปิณฺฑํ น ลเภยฺยนฺ ติ. "เตนหิ ภนฺเต ปุน ปวิสถ าติ. เอวํ กิร สฺส อโหสิ "สเจ ปุน ปวิสติ, สพฺเพสํ สรีเร อธิมุจฺจิตฺวา อิมสฺส ปุรโต ปาณึ ปหริตฺวา หสนเกฬึ กริสฺสามี ติ. ตสฺมึ ขเณ ตา กุมาริกาโย คามทฺวารํ ปตฺวา สตฺถารํ ทิสฺวา วนฺทิตฺวา เอกมนฺตํ อฏฺํสุ. มาโรปิ สตฺถารํ อาห "อปิ ภนฺเต ปิณฺฑํ อลภมานา ชิฆจฺฉาทุกฺเขน ปีฬิตตฺถ าติ. สตฺถา "อชฺช มยํ ปาปิม กิญฺจิ อลภิตฺวาปิ อาภสฺสรเทวโลเก พฺรหฺมาโน วิย ปีติสุเขเนว วีตินาเมสฺสาม าติ วตฺวา อิมํ คาถม าห
	"สุสุขํ วต ชีวาม, เยสนฺ โน นตฺถิ กิญฺจนํ, ปีติภกฺขา ภวิสฺสาม เทวา อาภสฺสรา ยถา ติ.
	ตตฺถ "เยสนฺโนติ: เยสํ อมฺหากํ ปลิพุทฺธนตฺเถน ราคาทีสุ
กิญฺจเนสุ เอกํปิ กิญฺจนํ นตฺถิ. ปีติภกฺขาติ: ยถา อาภสฺสรา เทวา ปีติภกฺขา หุตฺวา ๒ วีตินาเมนฺติ, เอวํ มยํปิ ภวิสฺสาม าติ อตฺโถ.

	เทสนาวสาเน ปญฺจสตาปิ ตา กุมาริกาโย โสตาปตฺติผเล
ปติฏฺหึสู ติ.
มารวตฺถุ.
************
๑. คามาภิมุขินิโยติปิ ปาโ. ๒. อิโต ปรํ สี. ยุ. โปตฺถเกสุ ปีติสุเขเนวาติ ปทํ ทิสฺสติ.