ชั้นประโยค ป.ธ.๓

	๙. สนฺตกายตฺเถรวตฺถุ. (๒๖๐)

	"สนฺตกาโยติ อิมํ ธมฺมเทสนํ สตฺถา เชตวเน วิหรนฺโต
สนฺตกายตฺเถรํ อารพฺภ กเถสิ.

	ตสฺส กิร หตฺถปาทกุกฺกุจฺจนฺ นาม นาโหสิ, กายวิชมฺภนรหิโต
สนฺตอตฺตภาโว อโหสิ. โส กิร สีหโยนิยา อาคโต [เถโร]. สีหา กิร เอกทิวสํ โคจรํ คเหตฺวา รชตสุวณฺณมณิปวาฬคุหานํ อญฺตรํ ปวิสิตฺวา มโนสิลาหริตาลจุณฺเณสุ สตฺตาหํ นิปชฺชิตฺวา สตฺตเม ทิวเส อุฏฺาย นิปนฺนฏฺานํ โอโลเกตฺวา, สเจ นงฺคุฏฺสฺส วา กณฺณานํ วา ปาทานํ วา จลิตตฺตา มโนสิลาหริตาลจุณฺณานํ วิปฺปกิณฺณตํ ปสฺสนฺติ, "น เต อิทํ ชาติยา วา โคตฺตสฺส วา ปฏิรูปนฺ ติ ปุน สตฺตาหํ นิราหารา นิปชฺชนฺติ; จุณฺณานํ ปน วิปฺปกิณฺณภาเว อสติ "อิทํ เต ชาติโคตฺตานํ อนุจฺฉวิกนฺ ติ อาสยา นิกฺขมิตฺวา วิชมฺภิตฺวา ทิสา อนุวิโลเกตฺวา ติกฺขตฺตุ สีหนาทํ นทิตฺวา โคจราย ปกฺกมนฺติ: เอวรูปาย สีหโยนิยา อาคโต อยํ ภิกฺขุ. ตสฺส กายสมาจารํ ทิสฺวา ภิกฺขู สตฺถุ อาโรเจสุ "น โน ภนฺเต สนฺตกายตฺเถรสทิโส ภิกฺขุ ทิฏฺปุพฺโพ, อิมสฺส หิ นิสินฺนฏฺาเน หตฺถจลนํ วา ปาทจลนํ วา กายวิชมฺภิตา ๑ วา นตฺถี ติ. ตํ สุตฺวา สตฺถา "ภิกฺขเว ภิกฺขุนา นาม สนฺตกายตฺเถเรน วิย กายาทีหิ อุปสนฺเตเนว ภวิตพฺพนฺ ติ วตฺวา อิมํ คาถม าห
	"สนฺตกาโย สนฺตวาโจ สนฺตมโน ๒ สุสมาหิโต วนฺตโลกามิโส ภิกฺขุ อุปสนฺโต ติ วุจฺจตี ติ.
	ตตฺถ "สนฺตกาโยติ: ปาณาติปาตาทีนํ อภาเวน สนฺตกาโย,
มุสาวาทาทีนํ อภาเวน สนฺตวาโจ, อภิชฺฌาทีนํ อภาเวน สนฺตมโน,๒ กายาทีนํ ติณฺณํปิ สุฏฺฐุ สมาหิตตฺตา สุสมาหิโต, จตูหิ มคฺเคหิ โลกามิสสฺส วนฺตตาย วนฺตโลกามิโส, [ภิกฺขุ] อพฺภนฺตเร ราคาทีนํ อุปสนฺตตาย อุปสนฺโต ๓ วุจฺจตี ติ อตฺโถ.

	เทสนาวสาเน เถโร อรหตฺเต ปติฏฺหิ, สมฺปตฺตานํปิ สาตฺถิกา
เทสนา อโหสี ติ.
สนฺตกายตฺเถรวตฺถุ.
************
๑. สี. ยุ. กายวิชมฺภิกา. ๒. สี. ม. ยุ. สนฺตวา. ๓. สี. ม. ยุ. อุปสนฺโตติ.