ชั้นประโยค ป.ธ.๓

	๙. กิสาโคตมีวตฺถุ. (๒๑๑)

	"ตํ ปุตฺตปสุสมฺมตฺตนฺติ อิมํ ธมฺมเทสนํ สตฺถา เชตวเน
วิหรนฺโต กิสาโคตมึ อารพฺภ กเถสิ.

	วตฺถุ สหสฺสวคฺเค
	"โย จ วสฺสสตํ ชีเว อปสฺสํ อมตํ ปทํ, เอกาหํ ชีวิตํ เสยฺโย ปสฺสโต อมตํ ปทนฺ ติ
คาถาวณฺณนาย วิตฺถาเรตฺวา กถิตํ. ตทา หิ สตฺถา "กิสาโคตมิ ลทฺธา เต เอกจฺฉรมตฺตา สิทฺธตฺถกา ติ อาห. "น ลทฺธา ภนฺเต, สกลคาเม ชีวนฺเตหิ มตกาว พหุตราติ. อถ นํ สตฺถา "ตฺวํ `มเมว ปุตฺโต มโต ติ สลฺลกฺเขสิ, ธุวธมฺโม เอส สพฺพสตฺตานํ, มจฺจุราชา หิ สพฺพสตฺเต อปริปุณฺณชฺฌาสเยเอว มโหโฆ วิย ปริกฑฺฒมาโน อปายสมุทฺเท ปกฺขิปตี ติ วตฺวา ธมฺมํ เทเสนฺโต อิมํ คาถม าห
	"ตํ ปุตฺตปสุสมฺมตฺตํ พฺยาสตฺตมนสํ นรํ สุตฺตํ คามํ มโหโฆ ว มจฺจุ อาทาย คจฺฉตี ติ.
	ตตฺถ "ตํ ปุตฺตปสุสมฺมตฺตนฺติ: ตํ รูปพลาทิสมฺปนฺเน ปุตฺเต จ
ปสู จ ลภิตฺวา "มม ปุตฺตา อภิรูปา พลสมฺปนฺนา ปณฺฑิตา สพฺพกิจฺจสมตฺถา, มม โคโณ อภิรูโป อโรโค มหาภารสโห, มม คาวี พหุขีรา ติ เอวํ ปุตฺเตหิ จ ปสูหิ จ สมฺมตฺตํ ปมตฺตํ นรํ. พฺยาสตฺตมนสนฺติ: หิรญฺสุวณฺณาทีสุ วา ปตฺตจีวราทีสุ วา กิญฺจิเทว ลภิตฺวา ตโต อุตฺตริตรํ ปตฺถนตาย อาสตฺตมานสํ. จกฺขุวิญฺเยฺยาทีสุ อารมฺมเณสุ วุตฺตปฺปกาเรสุ วา ปริกฺขาเรสุ ยํ ยํ ลทฺธํ โหติ ตตฺถ ตตฺเถว ลคฺคนตาย พฺยาสตฺตมานสํ วา. สุตฺตํ คามนฺติ: นิทฺทํ อุปคตํ สตฺตนิกายํ. มโหโฆวาติ: ยถา เอวรูปํ คามํ คมฺภีรวิตฺถโต มหนฺโต มหานทีโอโฆ อนฺตมโส สุนขํปิ อเสเสตฺวา สพฺพํ อาทาย คจฺฉติ; เอวํ วุตฺตปฺปการํ นรํ มจฺจุ อาทาย คจฺฉตี ติ อตฺโถ.

	เทสนาวสาเน กิสาโคตมี โสตาปตฺติผเล ปติฏฺหิ,
สมฺปตฺตานํปิ สาตฺถิกา เทสนา อโหสี ติ.
กิสาโคตมีวตฺถุ.
************