บทสวดทำวัตรเย็น แบบที่ ๒

	อะระหัง สัมมาสัมพุทโธ ภะคะวา, พุทธัง ภะคะวันตัง อะภิวาเทมิ (กราบ)
	สวากขาโต ภะคะวะตา ธัมโม, ธัมมัง นะมัสสามิ (กราบ)
	สุปะฎิปันโน ภะคะวะโต สาวะกะสังโฆ, สังฆัง นะมามิ (กราบ)

	นะโม ตัสสะ ภะคะวะโต อะระหะโต สัมมาสัมพุทธัสสะ (ว่า ๓ ครั้ง)

พุทธานุสสะติ
			ตัง โข ปะนะ ภะคะวันตัง เอวัง กัลยาโณ กิตติสัทโท อัพภุคคะโต,
อิติปิ โส ภะคะวา อะระหัง สัมมาสัมพุทโธ, วิชชาจะระณะสัมปันโน สุคะโต โลกะวิทู, อะนุตตะโร ปุริสะทัมมะสาระถิ สัตถา เทวะมะนุสสานัง พุทโธ ภะคะวาติ ฯ
			พุทธาภิคีติ
				พุทธะวาระหันตะวะระตาทิคุณาภิยุตโต,
				สุทธาภิญาณะกะรุณาหิ สะมาคะตัตโต,
				โพเธสิ โย สุชะนะตัง กะมะลังวะ สูโร,
				วันทามะหัง ตะมะระณัง สิระสา ชิเนนทัง,

			พุทโธ โย สัพพะปาณีนัง		สะระณัง เขมะมุตตะมัง,
		ปะฐะมานุสสะติฏฐานัง			วันทามิ ตัง สิเรนะหัง,
		พุทธัสสาหัสมิ ทาโส วะ			พุทโธ เม สามิกิสสะโร,
		พุทโธ ทุกขัสสะ ฆาตา จะ			วิธาตา จะ หิตัสสะ เม,
		พุทธัสสาหัง นิยยาเทมิ			สะรีรัญชีวิตัญจิทัง,
		วันทันโตหัง จะริสสามิ			พุทธัสเสวะ สุโพธิตัง,
		นัตถิ เม สะระณัง อัญญัง			พุทโธ เม สะระณัง วะรัง,
		เอเตนะ สัจจะวัชเชนะ			วัฑเฒยยัง สัตถุสาสะเน,
		พุทธัง เม วันทะมาเนนะ			ยัง ปุญญัง ปะสุตัง อิธะ,
		สัพเพปิ อันตะรายา เม			มาเหสุง ตัสสะ เตชะสา,
(หมอบกราบลงว่า)
				กาเยนะ วาจายะ วะ เจตะสา วา,
				พุทเธ กุกัมมัง ปะกะตัง มะยา ยัง,
				พุทโธ ปะฏิคคัณหะตุ อัจจะยันตัง,
				กาลันตะเร สังวะริตุง วะ พุทเธ.

ธัมมานุสสติ
			สวากขาโต ภะคะวะตา ธัมโม สันทิฏฐิโก อะกาลิโก, เอหิปัสสิโก
โอปะนะยิโก ปัจจัตตัง เวทิตัพโพ วิญญูหีติ ฯ
			ธัมมาภิคีติ
				สวากขาตะตาทิคุณะโยคะวะเสนะ เสยโย,
				โย มัคคะปากะปะริยัตติวิโมกขะเภโท,
				ธัมโม กุโลกะปะตะนา ตะทะธาริธารี,
				วันทามะหัง ตะมะหะรัง วะระธัมมะเมตัง,

			ธัมโม โย สัพพะปาณีนัง		สะระณัง เขมะมุตตะมัง,
		ทุติยานุสสะติฏฐานัง			วันทามิ ตัง สิเรนะหัง,
		ธัมมัสสาหัสมิ ทาโส วะ			ธัมโม เม สามิกิสสะโร,
		ธัมโม ทุกขัสสะ ฆาตา จะ			วิธาตา จะ หิตัสสะ เม,
		ธัมมัสสาหัง นิยยาเทมิ			สะรีรัญชีวิตัญจิทัง,
		วันทันโตหัง จะริสสามิ			ธัมมัสเสวะ สุธัมมะตัง,
		นัตถิ เม สะระณัง อัญญัง			ธัมโม เม สะระณัง วะรัง,
		เอเตนะ สัจจะวัชเชนะ			วัฑเฒยยัง สัตถุสาสะเน,
		ธัมมัง เม วันทะมาเนนะ			ยัง ปุญญัง ปะสุตัง อิธะ,
		สัพเพปิ อันตะรายา เม			มาเหสุง ตัสสะ เตชะสา ฯ
(หมอบกราบลงว่า)
				กาเยนะ วาจายะ วะ เจตะสา วา,
				ธัมเม กุกัมมัง ปะกะตัง มะยา ยัง,
				ธัมโม ปะฏิคคัณหะตุ อัจจะยันตัง,
				กาลันตะเร สังวะริตุง วะ ธัมเม.

สังฆานุสสติ
			สุปะฏิปันโน ภะคะวะโต สาวะกะสังโฆ อุชุปะฏิปันโน ภะคะวะโต
สาวะกะสังโฆ, ญายะปะฏิปันโน ภะคะวะโต สาวะกะสังโฆ, สามีจิปะฏิปันโน ภะคะวะโต สาวะกะสังโฆ, ยะทิทัง จัตตาริ ปุริสะยุคานิ อัฏฐะ ปุริสะปุคคะลา เอสะ ภะคะวะโต สาวะกะสังโฆ, อาหุเนยโย ปาหุเนยโย ทักขิเณยโย อัญชะลีกะระณีโย อะนุตตะรัง ปุญญักเขตตัง โลกัสสาติ ฯ
			สังฆาภิคีติ
				สัทธัมมะโช สุปะฏิปัตติคุณาทิยุตโต,
				โยฏฐัพพิโธ อะริยะปุคคะละสังฆะเสฏโฐ,
				สีลาทิธัมมะปะวะราสะยะกายะจิตโต,
				วันทามะหัง ตะมะริยานะคะณัง สุสุทธัง,

			สังโฆ โย สัพพะปาณีนัง		สะระณัง เขมะมุตตะมัง,
		ตะติยานุสสะติฏฐานัง			วันทามิ ตัง สิเรนะหัง,
		สังฆัสสาหัสมิ ทาโส วะ			สังโฆ เม สามิกิสสะโร,
		สังโฆ ทุกขัสสะ ฆาตา จะ			วิธาตา จะ หิตัสสะ เม,
		สังฆัสสาหัง นิยยาเทมิ			สะรีรัญชีวิตัญจิทัง,
		วันทันโตหัง จะริสสามิ			สังฆัสโสปะฏิปันนะตัง,
		นัตถิ เม สะระณัง อัญญัง			สังโฆ เม สะระณัง วะรัง,
		เอเตนะ สัจจะวัชเชนะ			วัฑเฒยยัง สัตถุสาสะเน,
		สังฆัง เม วันทะมาเนนะ			ยัง ปุญญัง ปะสุตัง อิธะ,
		สัพเพปิ อันตะรายา เม			มาเหสุง ตัสสะ เตชะสา,
(หมอบกราบลงว่า)
				กาเยนะ วาจายะ วะ เจตะสา วา,
				สังเฆ กุกัมมัง ปะกะตัง มะยา ยัง,
				สังโฆ ปะฏิคคัณหะตุ อัจจะยันตัง,
				กาลันตะเร สังวะริตุง วะ สังเฆ.

จบบทสวดทำวัตรเย็นแบบที่ ๒ เพียงเท่านี้